 |
| Photo of the girl is taken from Google. Thanks! |
तर कतिपय स्मार्ट र आदर्शवान मानिसहरु भन्ने गर्छन् ‘अनुहार राम्रो भएर के गर्नु ? व्यहोरा पो ठीक हुनुपर्छ नि !’ अति राम्रो कुरा मान्छेको सुन्दरता जस्तोसुकै होस्, व्यहोरा ठीक हुनुपर्छ; चरित्र राम्रो हुनुपर्छ । तरपनि मानिसहरु जीऊ पूरै घनश्याम वर्णको भएप
नि अनुहारको भाग जत्तिलाई गोरो बनाउन प्रयास गर्न छोडेका छैनन् ।
वास्तवमा सबै मानिस राम्रा छन् । सबैको आ–आफ्नै सुन्दरता छ । तर कतिपय अवस्थामा सुन्दरता; छालाको गोरोपनबाट नापिन्छ । यहाँ कोही काला छन्, कोही हल्का काला; अनि गहुँगोरो, गोरो र अति गोरो पनि । गोरोपन टल्किने नै; लगभग खुइल्याए जत्तिकै ।
सुन्दरताकै कारण थुप्रै स्त्रीहरुले शक्ति आफ्नो हातमा पारेका छन् । प्राचीन समयको मिश्र देशकी क्लियोपेट्राको बारेमा सायद पढेकै होऔँला । स्त्रीहरुको सुन्दरतामा थुप्रै महापुरुषहरुले आफूलाई जोखिममा पारेका छन्; आफ्नो गौरव गुमाएका छन् । एउटै उदाहरणः अमेरिकी राष्ट्रपति विल क्लिन्टन, एक मोनिका लेवेन्स्की नामकी सुन्दरीको जालमा फस्नु ।
महिला होस् वा पुरुष; धेरैजनालाई आफ्नो सुन्दरतामा घमण्ड हुनसक्छ । केटाहरुमाः कसैको ज्यान ‘भी’ सेपको, सिक्स प्याक भएको, हाईट धेरै भएको, पाखुरा बलियो आदि इत्यादि । केटीहरुमाः कसैको आँखा राम्रो, कसैको कपाल राम्रो, कसैको हुरुक्कै पार्ने गुलाबी ओठ; अनि कसैको जादुमय मीठो बोली आदि इत्यादि ।
बाइबलमा पनि यस्तै थुप्रै सुन्दर पुरुषहरुको वर्णन छः योसेफ हेर्नमा सुन्दर थिए; शिमशोन जत्ति बलिया कोही थिएनन्; दाउदका जेठा–माइला दाजुहरुलाई शमुयलले सुन्दर देखे । शाउल पनि वैंसमा सुन्दर थिए, उनी अग्ला थिए; अरु मानिसहरु उनको काँधसम्म मात्र आइपुग्थे । दाउदलाई पनि गोल्यतले हेर्दा राता–राता गाला भएका ठिटो देखे; राता–राता गाला भएका ठिटोहरु त्यसै ह्याण्डसम हुन्छन् होइन त ! दाउदको छोरा अब्शालोम पनि अत्यन्तै सुन्दर थिए । अरु पनि थुप्रै उदाहरण अवश्य छन् ।
एउटा सत्य कुरा पनि नलुकाऊँ जस्तो लाग्यो । लाहुरेहरुको नजरमा पर्नलाई दिदी–बहिनीहरुले विशेष मेहनत गर्नुपर्ने हुन्छ । उनीहरु हावा तालमा लाहुरे भएका हुँदैनन् । यसैले मामुली स्त्रीहरुमाथि उनीहरुको नजर नपर्नु स्वभाविकै हो ।
बाइबलमा थुप्रै सुन्दरी स्त्रीहरुको वर्णन पनि छ । अब्राहामकी श्रीमति सारा अत्यन्त सुन्दरी थिइन् । यस्तै अबीगेल, रुथ, एस्तर आदी स्त्रीहरु अत्यन्तै सुन्दरी थिए । अयुबको आफ्नो संकष्ट पछि जन्मेका छोरीहरु तत्कालीन देशमैै उनीहरु जत्ति सुन्दरीहरु अरु थिएनन् । राजा दाउदकी छोरी तामार परमसुन्दरी थिइन् ।
कतिपय अवस्थामा यस्तो पनि हुनसक्छः मानिस आफू जति सुन्दर भए पनि आफूभन्दा सुन्दर वा सुन्दरी अरुलाई मात्रै देख्छ । हरेकसँग आफ्नो सुन्दरतामा गुनासो पनि हुनसक्छ, कोही बढी सुकेको, कोही बढी फुकेको । कोही छाला र हड्डी मात्रै, कोही पानी मात्र खाँदा पनि सुँगुरजस्तै मोटाउने । कोही आफ्नो श्रीमति भन्दा अरुको श्रीमतिलाई मात्रै बढी राम्री देख्ने । कसैको मनमा यस्तो हुनसक्छः मेरो आँखा हल्का गाजलु वा ठूलो भए..., मेरो नाक हल्का अग्लो कि अति अग्लो नभईदिएको भए...., म थोरै बढी गोरो भएको भए...., हल्का स्लीम भएको भए... वा केही बढी हाइट भएको भए.... के–के हुन्थ्यो के–के ! सायद संसारै पो आफ्नो हुन्थ्यो कि !
एउटा विश्लेषण यस्तो छः कोही अनुहार नराम्रो भएपनि चरित्रको धनी हुन्छन् । कसैको अनुहार राम्रो भएको पनि व्यहोरा सिद्धिगा’को हुन्छ । कसैको अनहार पनि हिंस्रक, खाउँला जस्तै देखिने; त्यहि माथि व्यहोराले झ्याप्पै साथ दिएपछि मान्छे त दानव नै भयो नि । अनुहार पनि राम्रो, व्यहोरा उस्तै राम्रो, बोलीवचन झन मिठो....वाह ! यस्ता मानिसहरु त साँच्चै हीरा–मोती भन्दा धेरै मूल्यवान हुन्छन् । कतिपय तपाई–हामी अवश्य यहि ग्रुपमा पर्छौँ । यो खुशीको कुरा हो ।
मानिसहरु आफूलाई सुन्दर देखाउन थुप्रै आइडियाहरु लगाउनुभएको हुनसक्छ । म पनि के कम ? मलाई पनि सुन्दर देखिने रहर छ । म सुन्दर देखिनलाई प्रायः मुस्कुराउने गर्छु ।
अन्त्यमा, हामी जस्तोसुकै भएपनि परमेश्वरका हातका उत्तम सीपहरु हौँ भन्ने सम्झिनुपर्दछ । हामी सबै उहाँको सुन्दर सृष्टि हौँ । एउटा गम्भीर अनि मनन गर्नैपर्ने कुरो बाइबलमा यसो भनिएको छः ‘सौन्दर्य भ्रमात्मक हुन्छ, सुन्दरता उडिजाने हुन्छ । तर, परमेश्वरको भय मान्ने स्त्रीको नै प्रशंसा गरिनुपर्दछ ।’ अर्को शब्दमा यसो पनि भन्न सकिन्छः ‘...परमेश्वरको भय मान्ने पुरुषको नै प्रशंसा गरिनुपर्दछ ।’ मलाई विश्वास छ; तपाईं हामी परमेश्वरको भयमा बाँचेको मान्छे । हाम्रो शरीरबाट पनि बाँचुञ्जेल परमेश्वरलाई नै महिमा होस् ।